L A N D S C H A F T S V E R B A N D     S T A D E :   P L A T T D E U T S C H E   T E X T E


Landschaftsverband Stade: Plattdeutsche Texte, nicht nur für den plattdeutschen Schüler-Lesewettbewerb im Elbe-Weser-Dreieck:

Detlef Kolze
Wulken-Football

De dree Bengels moken sik lustig över de dicke Fru. Direktemang vör ehre Oogen rumpel un pumpel se över den Strand un wull na dat Water hen. De dree keeken sik mit groote Oogen an. Se hauen sik op de Schullern, apen den bulterigen Lief mit de Hannen na un grienen över soveel Fleesch op een Bülten.

Bi’t eerste Henkieken sehg de Fru worraftig ‘n beten wat vigeliensch ut. Twee dennige Been-Stampen hollen den Lief an de Eer fast, un all överall wölter sik de Speck ut dat beten Baadtüüg ruut. Rank un slank un schöön sehg dat allens jüst nich ut, man de Fru harr sik mit ehre Figuur inricht, un se weer doorbi ook noch heel un deel kregel bleben. So as se door meist ‘n beten stolt över den Strand güng, weer se afsluuts nich bloots ‘n slappen Fettklopps, de sik meist nich mehr rögen kunn. Door seet Knööf un Wuppdi achter, dat kunn ‘n goot sehen.

De Bengels weern an’t Footballspeelen un föhren sik op as lütte Artisten. De eene harr sogaar den Namen vun den famöösen Ronaldo op sien Hemd stahn. Se flögen döör de Luft achter den Ball her, jachtern över den Sand vun hier na door un bölken as nix Goodes. As nu de Ball direktemang op de Fru to kuller, füngen de dree noch maal woller an to gackeln un to juuchen un reepen ehr to, se schull den Ball man maal ornlich trüch ballern.

De Fru besinn sik nich langen un stüür op dat witte Dings loos. Quick un licht leet se dat rechte Been kort na achtern bammeln un dunner denn wedder den Ball, as harr dat sowat as ‘n Raketenstart geben. In’n sülbigen Oogenblick leegen de Jungs all op’n Buuk in’n Sand un hollen sik de Hannen an de Ohren, denn de Ball suus jem as’n worraftigen Komeet mit’n Füürsteert över de Köpp weg, dat jem woll meist de Haar ansengelt weern, wenn se sik nich so gau hensmeten harrn.

De dicke Fru dammel wieter den Strand langs, as weer nix Besünneres passeert. As ‘n Aal slängel se sik ünnen in dat brusen Water rin, glipp suutje döör de Bülgen un speel vergnöögt mit dat Water.

Bloots de Jungs weern fardig mit de Welt. Bleek stünnen se door un lüüstern achter de Fru her, as weer se ut een vun düsse Films ruut jumpt, de in’t Kino för Angst un Schrecken sorgen schüllt.

Un ganz wiet baben twüschen de Wulken - wat de Bengels gaar nich sehen kunnen - door grien de leeve Gott un meen, dat op de Eer ja denn un wenn doch tominnst ‘n lütt beten Gerechtigkeit ween mutt.


So speel denn de Oole door baben an düssen Namiddag noch ’n beten Wulken-Football mit siene Engels. Een richtig schöönen Ball doorför harrn se ja jüst kreegen.




SEITENANFANG


SEITE SCHLIESSEN