K U L T U R    I N    D E R    R E G I O N



De Plattdüütschen - Förderverein für die plattdeutsche Sprache im Landkreis Stade

Statuten för den Vereen

De Plattdüütschen e. V.


 
 § 1  Noom un Sitt
 
(1)   De Vereen driggt den Noom „De PIattdüütschen" e.V. He hett sienen Sitt in Stood.

(2)   He schall in dat Vereeensregister bi 't Amtsgericht Stood indrogen warrn.
 

§ 2  Zweck
 
(1)   De Vereen verfolgt bloots un direktemang gemeennützige Zwecke in 'n Sinn von den Stremel „Steuerbegünstigte Zwecke“ von de Afgobenornung.
 
(2)   Zweck von den Vereen is de Pleeg von Kultuur un Heimaatkunn. De Zweck von de Statuten ward besünners denn umsett, wenn de Nedderdüütsche Sprook op verscheden Oort un Wies erholen, verbetert un ünner de Lüüd bröcht ward.
 
(3)   De Vereen mookt sien Arbeit ohn Lohn, he spekuleert nich to allereerst op sienen egen Vördeel.
 
(4)   Middel von den Vereen drööft bloots för Zwecke insett warrn, as se in disse Statuten stoht. Mitglieder kriegt keen Towenn ut Middel von den Vereen.
 
(5)   Keeneen Persoon dröff dör Utgoben, de den Zweck von den Vereen frömd sünd, oder dör utermoten hoge Vergöden beter stellt warrn.


§ 3  Mitgliedschop
 
(1)   Mitglied von den Vereen kann jeedeen natüürliche oder juristische Persoon warrn, de den Vereen ünnerstütten deit.
 
(2)   Ober den Andrag to de Opnohm in den Vereen hett de Vörstand dat letzte Woort.
 
(3)   De Mitgliedschop höört op dör Dood, Utsluss, Strieken von de Mitgliederlist oder dör Uttritt ut den Vereen. De Uttritt is bloots to 't Enn von 't Geschaftsjohr mööglich. He mutt to Papier bröcht un den Vörstand vörleggt warrn.
 
(4)   Wenn een Mitglied gegen de Intressen von den Vereen Unrecht doon hett oder trutz Anstöten mit den Bidrag för een Johr torüch blifft, kann dat Mitglied von den Vörstand op de Steed utsloten warrn. Man vörher mutt dat Mitglied sik utspreken un wehren könen. Gegen den Besluss kann dat Mitglied bi de Mitgliederversammeln gegenan gohn.
 

§ 4  Bidrääg
 
(1)   De Mitglieder betohlt Bidrääg so os dat de Mitgliederversammeln besloten hett. För dat Fastsetten von de Bidräag is eenfache Mehrheit nootwennig.
 

§ 5  Organe von den Vereen
 
(1)   Organe von den Vereen sünd de Mitgliederversammeln un de Vörstand.
 

§ 6  De Vörstand
 
(1)   De Vörstand besteiht ut fief Vörstandsmitglieder, den eersten, den tweeten un den drütten Vörsitter,
den Kassenföhrer so as den Schriftföhrer.
 
(2)   Vörstand na § 26 BGB sünd de 1. oder de 2. Vörsitter. Jeder dröff för sik alleen den Vereen vertreden.
 
(3)   De Vörstand hett dat lopen Geschäft von den Vereen op de Reeg to holen.
 
(4)   Bi ielige Soken kann de Vörstand eenen Besluss uk schriftlich oder telefonisch fastleggen, wenn keen Vörstandsmitglied dorgegen is.
 
(5)   De Vörstand ward von de Mitgliederversammeln op de Duur von dree Johr wählt. Wedderwohl is mööglich. De Vörstandsmitglieder blievt bit to de Wohl von jemehr Nofolger in 't Amt.
 

§ 7  Mitgliederversammeln

(1)   De Mitgliederversammeln is in dat eerste Quartaal von jeedeen Johr aftoholen.
 
(2)   Uterornliche Mitgliederversammeln sünd to beropen, wenn dat Intress von den Vereen dat nootwennig mookt oder de Berufung von een Drüttel von all de Vereensmitglieder von den Vörstand verlangt ward; dorbi mööt de Grünnen angeben warrn.
 
(3)   De Mitglieder ward to Versammeln schriftlich dör den 1. Vörsitter, den 2. Vörsitter oder den 3. Vörsitter inloodt. Een Inlodungsfrist von twee Weken mutt inholen un dorbi uk de Tagesornung künnig mookt warrn.
 
(4)   Jeedeen Mitglied kann bit to een Week vör een Mitgliederversammeln bi den Vörstand op schriftliche Oort noch wat to de Tagesornung tostüürn.
 
(5)   De Mitgliederversammeln wählt all dree Jahr den Vörstand.
 
(6)   De Mitgliederversammeln is de Johresreken un de Johresbericht schriftlich vörtoleggen, dormit se öber de Genehmigung un Entlastung besluten kann. De Johresreken ward eenmol in't Johr von twee von de Mitgliederversammlen bestellte Kassenprüfer dörkeken, schriftlich optekend un op de Mitgliederversammeln vördrogen.
De Mitgliederversammeln bestimmt uk noch öber:
    a) den Huushaltsploon
    b) de Mitgliederbidrääg
    c) Andrääg
    d) An- un Verkoop von Grundstücken
    e) Bedeligung an Gesellschopen
    f) Opnehmen von Darlehn
    g) Ännerung von de Statuten
    h) Oplösen von den Vereen

(7)   Öber dat, wat op de Mitgliederversammeln besloten ward, is een Protokoll to föhren, dat von twee Vörstandsmitglieder to ünnerschrieben is.
 

§ 8  Oplösen von den Vereen un „Anfallberechtigung"
 
(1)   För den Besluss, de Statuten to ännern oder den Vereen optolösen. is een Mehrheit von dree Viddel von all de Mitglieder nootwennig, de bi de Versammeln mit bi sünd. De Besluss kann bloots foot warrn, wenn dat rechttiedig in de Inlodung künnig mookt worrn is.
 
(2)   Bi Oplösung oder Wegfall von de stüürbegünstigten Zwecke fallt dat Vermögen von den Vereen an den Landkreis Stood, de dat unmiddelboor un för nix anners os för gemeennützige Zwecke in 'n Landkreis Stood to verwennen hett.

(3)   Allens, wat öber dat Verwennen von dat Vereensvermögen besloten ward, in den Fall dat de Vereen oplööst worrn is, dröff eerst no dat Inwilligen von dat Finanzamt ümsett warrn.

 

Stood, den 25. Juni 2002

Impressum   Pfeil för Lenken


Pfeile linksTorüch Pfeile rechts
Pfeile linksSiet tomakenPfeile rechts