K U L T U R    I N    D E R    R E G I O N


De Plattdüütschen - Förderverein für die plattdeutsche Sprache im Landkreis Stade


Plattdüütsch is keen Jux-Spraak
Vun't Johrsversammeln bericht't de Schrieber Thomas Stelljes.


Ik hüür ja to een Minderheit; dat bün ik annerletzt wieswoorn. De „Minderheit“, dat sünd all de Lüüd, de noch Plattdüütsch snackt oder tomindst Plattdüütsch noch verstohn könnt. So üm un bi teihn Millionen Minschen schöllt dat in ganz Norddüütschland noch ween, segg tomindst Dr. Reinhard Goltz vun dat Institut för Nedderdüütsche Sprook (INS) in Bremen. He is vergohn Mondag in Düdenbüttel bi den Vereen „De Plattdüütschen“ to Gast ween un hett bi de Versammlung een Vördrag holen. Sien Thema wüür heel interessant: „Wo geiht dat hen mit de plattdüütsche Sprook?“ Bald sösstig Tohüürers hebbt toluustert un forts maarkt, dat se ook to een Minderheit tohüürt – man to een Minderheit mit Kultur.
Dorbi is Plattdüütsch nich beter as anners een Sprook. Plattdüütsch is jüst so veel wert as Inglisch, Russisch oder Chineisisch, segg Dr. Goltz. För de Lüüd, de hier in Norddüütschland leevt, hett de nedderdüütsche Sprook liekers noch een ganz anner Bedüüden: Se is een Stück vun uns Kultur un vun uns eegen „Identität“ – se hüürt dor eenfach mit to. Un dat nich bloots för de Plattdüütschen sülbst. Ook de Hochdüütschen dää hier in ’n Norden wat fehlen, wenn ’t opmol nix miehr to hüürn geev op Platt.
Kultur – un jüst dat Plattdüütsche – mutt nu natürlich pleegt waarn, anners löppt dat bloots op Schiet rut. Gräsig wüür dat ja wohl, wenn den eenen Dag de nedderdüütsche Sprook wohrhaftig verswunnen wüür un wi harrn dor nix an doon. Kümmern mutt ’n sik also, segg dorüm nich bloots Dr. Goltz vun ’t INS. Dat fangt wiss in de Familien an, man Plattdüütsch dröff ook in ’n Kinnergorden un in ’e School nich to kort komen. Dor mutt noch veel miehr mookt waarn – un snackt waarn mutt natürlich vör alln.
„Platt is nich uncool“, hett Ina Müller uns all mennigmol in ’t Stadeum vertellt. Recht hett se. Man Plattdüütsch is keen Jux-Sprook. Oma un Opa hebbt sik freuher ook nich bloots Döntjes vertellt den ganzen Dag. De hebbt ehr plattdüütsche Sprook bruukt dat ganze Leven lang – för de lustigen, man ook för de truurigen un iernsthaften Sooken. Op Platt snacken, schimpen oder dröömen – dat hüürt to Oma un Opa eenfach mit to. Vundoog mookt dat ja man bloots noch een „Minderheit“. Man dor bün ik stolt op, dat ik dor ook mit tohüür.



Pfeile linksTorüch Pfeile rechts
Pfeile linksSiet tomakenPfeile rechts